🟢 လားရှိုးမှာ စက်သုံးဆီစျေး တစ်လီတာကို (၂,၅၀၀)ကျော်အထိ ထပ်မံ မြှင့်တက်လာ

🟢 လားရှိုးမှာ စက်သုံးဆီစျေး တစ်လီတာကို (၂,၅၀၀)ကျော်အထိ ထပ်မံ မြှင့်တက်လာ

ရွှေဖီမြေ၊ မေလ ၂၃ ရက်၊ လားရှိုး

ရှမ်းမြောက် လားရှိုးမြို့မှာ ဓာတ်ဆီ၊ ဒီဇယ်စျေးနှုန်း အဆမတန် မြှင့်တက်လာတာကြောင့် ကားသမားတွေ အခက်အခဲ ကြုံတွေ့နေတယ်လို့ ပြောပါတယ်။

ဓာတ်ဆီ၊ ဒီဇယ်စျေးတွေအပြင် ကားအပိုပစ္စည်းတွေလည်း စျေးနှုန်း ၂ ဆ တက်လာတာကြောင့် အခက်အခဲ ကြုံနေကြတယ်လို့ ကားသမားတစ်ဦးက ပြောပါတယ်။

“ခက်ခဲတာပေါ့။ အခုက လေယာဥ်ခနဲ့အတူတူဖြစ်နေတယ်။ အားလုံးလည်း ဒုက္ခရောက်နေတယ်။ သူများကားခတွေ လိုက်တက်လို့ ကိုယ့်ဘက် လိုက်တက်ပြန်တော့လည်း မဟုတ်သေးဘူး။ အဲဒီတော့ မျှပြီးခံစားတယ်။ ခရီးသည်တွေနဲ့ညှိတယ်။ လားရှိုး-မန်စံတောင်မှ ဆိုင်ကယ် ကယ်ရီခ ၆ သောင်း ပေးရတယ်။ တစ်ချို့ဆိုရင် စျေးများရင် မလိုက်ဘူး။ မြို့ထဲတောင်မှ ကားနဲ့ဘယ်သွားသွား ငါးထောင်ပဲ။ ဆိုတော့ ကိုယ့်ခရီးသည်လည်း ကိုယ့်မိတ်ဆွေတွေပဲဆိုတော့ မျှခံတာပေါ့”

ကားအပိုပစ္စည်းတွေဟာ အရင်က အင်ဂျင်ဝိုင် ၄ လီတာ အလယ်အလတ်တန်းစားက ၂ သောင်းခွဲရှိပြီး လက်ရှိမှာတော့ ၅ သောင်းကျော် ရောက်ရှိသွားတယ်လို့ ဆိုပါတယ်။

“ခရီးသည်တွေလည်း အခက်အခဲအများကြီးရှိတယ်။ လားရှိုးကနေ နမ့်ဆန်ထိတောင်မှ ၁ သိန်းခွဲလောက်ရှိတယ်။ ဆီဖိုးက သုံးသောင်း ကျနေပြီ။ ကျနော့်အတွက် ၇ သောင်းပဲကျန်တယ်။ အသွားအပြန် လမ်းစရိတ်လည်းရှိသေးတယ်” ဆိုပြီး ၎င်းက ဆက်ပြောပါတယ်။

လားရှိုးမြို့ထဲက ဒီနေ့ ဓာတ်ဆီစျေးနှုန်းဟာ ၉၂ တစ်လီတာကို (၂,၅၅၀)ကျပ်၊ ၉၅ က (၂,၆၁၀)ကျပ်နဲ့ ဒီဇယ် ရိုးရိုး တစ်လီတာကို (၂,၄၃၀)ကျပ်၊ ပရိမီယံ (၂,၄၅၀)ကျပ်အထိ ရှိနေပါတယ်။

လက်ရှိ ဖြစ်နေတဲ့ပြဿနာဟာ မြန်မာနိုင်ငံရဲ့ နိုင်ငံရေး မတည်ငြိမ်မှုကြောင့် တချို့ကားအပိုပစ္စည်းတွေဟာ ပြည်ပကနေ မတင်သွင်းနိုင်တာလည်း ဖြစ်တယ်လို့ ပြောပါတယ်။

အခုလို စက်သုံးဆီနဲ့ ကားအပိုပစ္စည်းတွေ အဆမတန် စျေးနှုန်းမြှင့်တက်လာတဲ့အတွက် မကိုက်တာကြောင့် အချို့ကားသမားက ခရီးစဥ်တွေကို ရပ်နားလိုက်ရသူတွေလည်း ရှိနေပါတယ်။

#စက်သုံးဆီ #မြှင့်တက်လာ #လားရှိုး

https://www.facebook.com/451214215694715/posts/1201511993998263/